Кліентамі яго фірмы быў Нацбанк, Мінпрацы. Што вядома пра палітвязня Вадзіма Храсько, які памёр у калоніі
Вадзім Храсько працаваў у сферы IT. Ягоная фірма абслугоўвала Нацбанк і шэраг іншых дзяржаўных арганізацый. У мужчыны засталася жонка і двое малых дзяцей, піша «Радыё Свабода».
Палітвязень Вадзім Храсько памёр у ноч на 9 студзеня ад запалення лёгкіх. Яго даставілі з калоніі «Віцьба» ў шпіталь, але выратаваць жыццё мужчыны лекарам не ўдалося. Мужчыну пахавалі ў Менску. Яму было 50 гадоў.
Працаваў у IT-фірмах, зарэгістраваных у пачатку 1990-х
Паводле інфармацыі, якую можна знайсці ў сацыяльных сетках Вадзіма, ён спачатку хадзіў у школу ў Заслаўі, потым у Менску. Прафесійная адукацыя пазначаная як няскончаная. Ягоны бацька Навум, імаверна, мог паходзіць з Латвіі. Чалавек з такімі імем і прозвішчам ёсць у спісах КПСС у латвійскім архіве.
Вадзім жыў у Менску. Працаваў у сферы IT, у фірмах, якія займаліся распрацоўкай праграмнага забеспячэння з пачатку 1990-х гадоў. Адно з першых месцаў працы — замежнае прадпрыемства «Лаппа ИП», якое існавала з 1991 года. Офіс месціўся на тэрыторыі Акадэміі навук.
Апошнім месцам працы Вадзім пазначыў кампанію «Авест». Ён быў кіраўніком групы. Там ён працаваў з 2000 года. Гэта прыватная кампанія, якая распрацоўвала праграмнае забеспячэнне крыптаграфічнай абароны інфармацыі, абараняла бізнэсы ад кібератакаў. Ейнымі кліентамі былі Нацбанк, Міністэрства падаткаў і збораў, Фонд сацыяльнай абароны насельніцтва, Міністэрства працы, Беларуская чыгунка, Белагрампрамбанк і некаторыя іншыя банкі.
Вёў сямейны Youtube-канал, глядзеў «Жыццё-маліна»
Вадзім вёў старонку ў сацыяльных сетках на расейскай мове. Публікаваў там у асноўным фота і відэа з жонкай і старэйшай дачкой. Ягоная жонка паходзіць з Татарстана, там жа пара ўзяла шлюб. У сям’і двое дзяцей, 5 і 9 гадоў.
Мужчына нават меў свой невялікі Youtube-канал з сямейнымі відэа. Ён фіксаваў, як старэйшае дзіця пачынае хадзіць, бавіцца, святкуе народзіны. «Прамень сонца залатога», — падпісаў ён адзін з фотаздымкаў з дачкой. Апошняя ягоная публікацыя ў сетках была ў 2017 годзе.
Вадзім глядзеў беларускі Youtube-канал Мікіты Мелказёрава «Жыццё-маліна», перадачы расейскага журналіста Ільі Варламава і дакументальныя фільмы пра прыроду. Слухаў гурт Depeche Mode і цікавіўся, як можна зрабіць пляж з басейнам дома.
Адправілі на тры гады ў калонію за некалькі данатаў
Вадзіма Храсько затрымалі летась у красавіку незадоўга да ягонага дня нараджэння. У жніўні яго асудзілі на 3 гады калоніі агульнага рэжыму за некалькі данатаў. Артыкул гучыць як «фінансаванне дзейнасці экстрэмісцкага фармавання». Дэталі справы невядомыя, але такой арганізацыяй мог быць, прыкладам, Байсол, які збірае грошы для рэпрэсаваных беларусаў, або полк Каліноўскага, які ваюе на баку Украіны.
Храсько спрабаваў абскардзіць прысуд у Вярхоўным судзе, але яго пакінулі ў сіле, нягледзячы на сур’ёзнае захворванне мужчыны. Да таго ж МУС унесла яго ў «спіс экстрэмістаў».
Палітвязня накіравалі ў калонію пад Віцебскам, дзе сядзіць шмат былых чыноўнікаў, сілавікоў, эканамічных злачынцаў. Там ён прабыў каля двух месяцаў.
Паводле інфармацыі праваабаронцаў, гэта ўжо чацвёртая смерць у зняволенні асуджанага па палітычных матывах. 21 траўня 2022 года ў шклоўскай калоніі № 17 (Магілёўская вобласць) памёр 50-гадовы актывіст і грамадскі дзеяч Вітольд Ашурак, 7 траўня 2023-га ў віцебскай калоніі — 61-гадовы блогер і актывіст Мікалай Клімовіч з хворым сэрцам. 11 ліпеня 2023 — прывезены ў бальніцу з гарадзенскай турмы № 1 57-гадовы мастак Алесь Пушкін, у якога дыягнаставалі прабадную язву.
У калоніі ад пнеўманіі памёр палітвязень Вадзім Храсько, асуджаны за данаты
Хто той суддзя, які адправіў у калонію Вадзіма Храсько — палітвязня з цяжкай хваробай, якая стала смяротнай
«Няма нічога больш істотнага за жыццё чалавека. І апраўдаць забойствы немагчыма». Ціханоўская выступіла з нагоды смерці Вадзіма Храсько
Спасылку на бот «Гаюна» сілавікі знайшлі на тэлефоне затрыманай актывісткі, якая працяглы час хавалася ў Беларусі14
Каментары