Як выглядае 46-гадовы юрыст Юрась Зянковіч праз тры з паловай гады зняволення ў беларускай турме

Юрыст Юрый Зянковіч, грамадзянін Беларусі і ЗША, быў затрыманы 12 красавіка 2021 года ў Маскве па так званай справе змоўшчыкаў. 

Ён абвінавачваўся па ч. 1 арт. 357 КК (змова з мэтай захопу дзяржаўнай улады неканстытуцыйным шляхам), ч. 1 арт. 361-1 КК (стварэнне экстрэмісцкага фармавання і кіраўніцтва ім), ч. 3 арт. 361 КК (публічныя заклікі да захопу дзяржаўнай улады), ч. 3 арт. 130 КК (распальванне сацыяльнай варожасці).

@nashaniva Як выглядае Юрась Зянковіч праз тры з паловай гады беларускай турмы #беларусь #палітвязні #беларус #сша #режим #правительство #урад #улада #рб #власть #суд #минск #нашаніва ♬ dźwięk oryginalny - Наша Ніва. Навіны

Юрый Зянковіч цалкам прызнаў сваю віну і не адмаўляў, што з'яўляўся арганізатарам змовы. Таксама ён папрасіў прабачэння ў саўдзельнікаў.

5 верасня 2022 г. суддзя Уладзімір Арэшка прызнаў Юрыя вінаватым і прысудзіў яму 11 гадоў калоніі ва ўмовах узмоцненага рэжыму.

КДБ уключыў яго ў спіс «асобаў, якія маюць дачыненне да тэрарыстычнай дзейнасці», а МУС — у спіс «асобаў, датычных да экстрэмісцкай дзейнасці».

Як паведамлялі праваабаронцы, Зянковіч трапіў у калоніі пад прэсінг — у бабруйскай ПК № 2 адміністрацыя прымушала Зянковіча выносіць вёдры з экскрэментамі і мыць прыбіральню, а калі той адмовіўся — адправілі ў ШІЗА. Там ён абвяшчаў галадоўку.

У снежні 2022 года Зянковічу дадалі яшчэ паўгода тэрміну — па справе аб абразе прадстаўніка ўлады.

Яшчэ праз нейкі час яго перавялі на турэмны рэжым у магілёўскую турму №4. У жніўні 2024 года Зянковіча судзілі яшчэ і «непадпарадкаванне адміністрацыі», але невядома, ці дадалі нейкі тэрмін.

Павялічыць

Сёння з'явіўся анонс прапагандысцкага відэа з удзелам Зянковіча. Мяркуючы па тызеры, Зянковіч зноў пацвярджае версію абвінавачання, пра тое, што разам з саўдзельнікамі рыхтаваў напад на Лукашэнку. 

Разам з Зянковічам па справе праходзілі Аляксандр Фядута, Рыгор Кастусёў, якія абвінавачваліся ў змове, здзейсненай з мэтай захопу дзяржаўнай улады неканстытуцыйным шляхам (ч. 1 арт. 357 КК), і таксама Вольга Галубовіч і Дзяніс Краўчук, яны абвінавачваліся ў актыўным удзеле ў групавых дзеяннях, якія груба парушаюць грамадскі парадак (ч. 1 арт. 342 КК).

Аляксандру Фядуту і Рыгору Кастусёву далі па 10 гадоў пазбаўлення волі; Вользе Галубовіч і Дзянісу Краўчуку — па 2,5 года пазбаўлення волі.

3 ліпеня 2024 года хворага Рыгора Кастусёва выпусцілі з гродзенскай турмы па амністыі. 

• 2
• 0
• 0
• 7
• 6
• 18
• 18
• 0