Яго пабудавала вядомая беларуская кампанія, якую падазраюць у абыходзе эканамічных санкцый супраць рэжыму Лукашэнкі.
На мінулым тыдні ў Ерэване былі вызначаны пераможцы XXXII Міжнароднага агляду-конкурсу Міжнароднай асацыяцыі саюзаў архітэктараў (МАСА).
Гран-пры і «залаты медаль» сярод рэалізаваных пабудоў былі прысуджаны шматфункцыянальнаму комплексу Alutech у Мінску.
Яго спраектавала беларускае бюро VIASET (архітэктары Дражын, Герус, Рахманько, Нікіценка, Міцько, Пятроўскі, Пішчалаў) у партнёрстве з нямецкай кампаніяй Architekten Wannenmacher + Möller GmbH (архітэктар Ваненмахер).
Таксама аўтарскі калектыў за гэты рэалізаваны праект будзе прадстаўлены да ўзнагароджання залатым медалём Міжурадавага савета краін СНД па супрацоўніцтве ў будаўнічай дзейнасці «За найлепшае архітэктурна-будаўнічае рашэнне».
Alutech — вядучы вытворца алюмініевых профільных сістэм у СНД і адзін з лідараў рынку ралетных сістэм і секцыйных варот у Еўропе. Без прадукцыі кампаніі абыходзіцца мала які прамысловы праект у Беларусі.
Новы комплекс Alutech, плошча якога складае 8500 квадратных метраў, размясціўся ў прамысловай зоне па вуліцы Сяліцкага, якая ўваходзіць у Свабодную эканамічную зону «Мінск». Ён пабудаваны па тэхналогіі хуткага ўзвядзення стальных будынкаў ASTRON.
Комплекс складаецца з некалькі аб'ёмаў: экспазіцыйнага цэнтра, эксперыментальна-вытворчай часткі і адміністрацыйнага блока.
Самі аўтары называюць свой праект яркім прыкладам прамысловай эстэтыкі, але ў рашэнні галоўнага фасада цяжка ўвогуле пазнаць прамысловы будынак. Такі выгляд хутчэй характэрны для культурна-грамадскага цэнтра ў якой-небудзь заходнееўрапейскай сталіцы.
У рашэнні фасада выкарыстаны мінімалістычныя сродкі архітэктурнай выразнасці, характэрныя для мадэрнізму. У абліцоўцы выкарыстаны панэлі, якія імітуюць светлы камень. Фасад падзелены на дзве няроўныя часткі. Правая мае суцэльнае зашкленне, часта і наўмысна нудна члянёнае вертыкальнымі рэбрамі, якія ў перспектыўным успрыманні, дзякуючы сваёй вялікай глыбіні, паступова замяшчаюць люстраную паверхню шкла.
На кантрасце зроблена левая частка, дзе ў заглыбленні з шырокімі скосамі, знаходзіцца галоўны ўваход. Рэбры, якія візуальна падтрымліваюць дах, размешчаны па ламанай крывой, што стварае эфект хвалі. Гэтыя вертыкальныя элементы працягваюцца ў адлюстраванні воднай роўнядзі дэкаратыўнага басейна.
Alutech і санкцыі
У сакавіку гэтага года «Бюро» сумесна з нямецкім выданнямі Paper Trail Media і Manager Magazin выпусцілі расследаванне пра тое, што кампанія Alutech абыходзіць санкцыі і пастаўляе ў Еўрасаюз падсанкцыйную прадукцыю. Робіць яна гэта праз сваю расійскую кампанію і чэшскі лагістычны цэнтр.
Сутнасць у тым, што праз тыдзень пасля поўнамаштабнага ўварвання Расіі ва Украіну Еўрапейскі саюз забараніў увозіць з Беларусі многія важныя тавары. Так холдынг «Алютэх» пазбавіўся магчымасці пастаўляць у краіны ЕС панэлі, вароты і дзверы са сталі.
Неўзабаве набыла моц забарона і на імпарт металургічнай прадукцыі з Расіі, але панэлі, вароты і дзверы са сталі не падпалі пад новыя абмежаванні ЕС. То-бок, з Беларусі некаторую прадукцыю «Алютэха» ў ЕС вывозіць ужо было нельга, а вось Расію забарона не закранула.
«Алютэх» скарыстаўся гэтым пралазам, але яго дзейнасць па абыходзе санкцый зацікавіла праваахоўныя органы ў Еўрасаюзе і Вялікабрытаніі. Праўда, пакуль расследаванне было спынена праз адсутнасць дастатковых падазрэнняў.
«Наша Нiва» — бастыён беларушчыны
ПАДТРЫМАЦЬ
Каментары