«Вельмі замінае вольнаму часу і працы». Скаргі на праблемы з інтэрнэтам у Беларусі працягваюцца

Адзін з чытачоў напісаў учора ноччу, а 2:00: «Мабільны інтэрнэт на А1 лёг. Не грузіць нават дзяржпарталы накшталт pravo.by». У пацверджанне сваіх слоў ён прыклаў скрын: ён спрабаваў адкрыць Instagram, заходзіў у тэлеграм, на YouTube і нават на pravo.by — нічога не працавала.

Суразмоўца адзначыў, што перабоі з інтэрнэтам яму асабіста «ствараюць шмат праблем», бо «на ім завязанае практычна ўсё». 

— Канкрэтна гэтай ноччу я не мог паглядзець серыял перад сном. Балазе маю хатнюю сетку. 

Ён успомніў, што тое ж самае было з ім тры дні таму — прыкладна, а 17:30, калі ён ехаў па Заводскім раёне Мінска: «Мабільны інтэрнэт не працаваў на працягу 20 хвілін». 

Чытач удакладняе, што правяраў на сайце правайдара — «ніякіх навін аб правядзенні хоць якіх работ на гэтым участку няма».

Ёсць скаргі і ад іншых карыстальнікаў:

— Вось толькі сёння інтэрнэт проста ўзяў і адсекся (або адсеклі), але хвілін праз 10 пасля званка ў «Белтэлекам» аднавіўся. 

А да гэтага ў нядзелю інтэрнэту не было ад 0:30 ночы і да 16:00 дня прыкладна (пры гэтым мабільны працаваў спраўна). Раней перыядычна ў выходныя ноччу і рана ранкам у нядзелю злучэнне адсутнічала — і так на працягу двух апошніх месяцаў. 

Суразмоўца абураецца, што гэта «вельмі замінае» і ягонай працы, і вольнаму часу, але не ўдакладняе як. Ён абмяркоўваў праблему з суседзямі, у тых правайдар — А1, і праблем такіх няма. 

Яшчэ адзін чытач расказаў нам, што «ўчора ў Discord не працавалі некаторыя эмодзі, і ў кітайскія гача-гульні складана было зайсці — праз раз з’яўлялася паведамленне: «Памылка размеркавання сервера. Праверце падключэнне да сеціва, перазагрузіце гульню і паспрабуйце зноў». 

У суразмоўцы хатні інтэрнэт ад А1. 

Журналісты праверылі сайты правайдараў: А1 паведамляе аб прафілактычных работах, праз якія 28 студзеня ва ўсёй краіне, а 29 — на вуліцы Мазурава — маглі не працаваць сэрвісы фіксаванай сувязі і VOKA. У МТС пазначана, што 28 студзеня «будуць праводзіцца планавыя работы на сетцы стаячага вышэй партнёра. У перыяд правядзення работ магчымае пагаршэнне якасці прапанаванай паслугі «Інтэрнэт».

«Белтэлекам» выклаў графік работ у абласцях і Мінску — праз іх, напрыклад, былі магчымыя перабоі з хатнім інтэрнэтам на праспекце Незалежнасці і вуліцы Хмяльніцкага.

А яшчэ адна чытачка расказвае пра праблемы з мабільным інтэрнэтам ад А1 сёння зранку. Яна прывяла дзіця ў паліклініку — і доўга не магла выклікаць таксі дадому: злучэнне адсутнічала.

— Пару мам у чарзе пад кабінетам доктара скардзіліся, што праз адсутнасць інтэрнэту на тэлефоне не могуць уключыць дзецям мульцікі, — так што праблема відавочна была не ў мяне адной. 

Пазней гэтая ж чытачка з цяжкасцю змагла падключыцца да анлайн-міта з калегамі, сувязь была вельмі дрэннай. Запыт у чат-бот пастаўшчыка паслуг нічога не даў: чытачцы даслалі інструкцыю, як усталяваць аўтаматычныя настройкі на тэлефоне.

Таксама паступаюць скаргі на працу VPN-сэрвісаў. Напрыклад, што дагэтуль «ад суботы не працуе Proton VPN — перыядычна падключаецца да рэдкіх сервераў, але інтэрнэту няма». 

Чытач спрабаваў і на ByFly, і на А1 — і нічога. «Працы гэта не закранае», — удакладняе ён. 

Другі чытач кажа, што знайшоў лайфхакі: ён мяняе серверы, пакуль не дойдзе да Румыніі — «да яе Proton VPN добра падключаецца». Аднак у папярэдняга спікера гэты лайфхакі не працуе: 

— Так, перыядычна знаходзяцца такія серверы, але звычайна пры падключэнні да іх альбо наогул знікае інтэрнэт, альбо застаецца працаваць толькі тэлеграм. А ўчора я змог падключыцца да аўстрыйскага сервера — і быў інтэрнэт, але праз гадзіну падключэнне перастала працаваць.

Пра збоі ў працы VPN-сэрвісаў карыстальнікі паведамляюць ад 25 снежня. Многія ў той дзень не маглі падключыцца да VPN-сэрвісаў Proton, NordVPN, TunnelBear і іншых. Некаторыя сэрвісы, напрыклад, Psiphon, заставаліся даступныя. Сярод сайтаў, пры падключэнні да якіх узніклі праблемы, — Twitch, Steam і Reddit.

• 1
• 0
• 0
• 2
• 0
• 0
• 0
• 0